एनटीएकडून नीट यूजी २०२६ परीक्षेची नवी तारीख जाहीर करण्यात आली असून परीक्षा २१ जून २०२६ रोजी होणार आहे. प्रवेशपत्र लवकरच अधिकृत संकेतस्थळावर उपलब्ध होणार आहे.
नवी दिल्ली : वैद्यकीय शिक्षणाचे स्वप्न पाहणाऱ्या लाखो विद्यार्थ्यांसाठी महत्त्वाची बातमी समोर आली आहे. National Testing Agency अर्थात एनटीएने नीट यूजी २०२६ परीक्षेची नवी तारीख जाहीर केली असून आता ही परीक्षा २१ जून २०२६ रोजी घेण्यात येणार आहे. यापूर्वी परीक्षा रद्द झाल्यानंतर देशभरातील सुमारे २२ लाख विद्यार्थ्यांमध्ये संभ्रमाचे वातावरण निर्माण झाले होते. मात्र नव्या तारखेच्या घोषणेनंतर विद्यार्थ्यांना मोठा दिलासा मिळाला आहे.
एनटीएने सोशल मीडिया प्लॅटफॉर्म एक्सवर अधिकृत पोस्टद्वारे परीक्षेच्या तारखेची घोषणा केली. भारत सरकारच्या मान्यतेनंतर नीट यूजी २०२६ परीक्षा पुन्हा घेण्याचा निर्णय घेण्यात आल्याचे एजन्सीकडून स्पष्ट करण्यात आले आहे. परीक्षा देशभरातील विविध केंद्रांवर २१ जून रोजी आयोजित करण्यात येणार असून प्रवेशपत्रही लवकरच अधिकृत संकेतस्थळावर प्रसिद्ध केले जाणार आहे.
एनटीएने विद्यार्थ्यांना आणि पालकांना केवळ अधिकृत माहितीवरच विश्वास ठेवण्याचे आवाहन केले आहे. सोशल मीडियावर फिरणाऱ्या अफवा किंवा अनधिकृत संदेशांकडे दुर्लक्ष करण्यास सांगण्यात आले आहे. परीक्षा, प्रवेशपत्र किंवा केंद्रासंदर्भातील कोणतीही माहिती फक्त अधिकृत संकेतस्थळ आणि अधिकृत माध्यमांवरूनच तपासावी, असे स्पष्ट करण्यात आले आहे.
परीक्षेच्या नव्या तारखेच्या घोषणेनंतर आता विद्यार्थ्यांनी अंतिम तयारीला वेग द्यावा, असा सल्लाही देण्यात आला आहे. देशभरातील लाखो विद्यार्थी वैद्यकीय अभ्यासक्रमांमध्ये प्रवेश मिळवण्यासाठी या परीक्षेला बसणार आहेत. त्यामुळे परीक्षा सुरळीत आणि पारदर्शक पद्धतीने पार पाडण्यासाठी एनटीएकडून तयारी सुरू करण्यात आली आहे.
दरम्यान, परीक्षा केंद्र, प्रवेशपत्र किंवा इतर तांत्रिक अडचणींसंदर्भात विद्यार्थ्यांना मदतीची सुविधा उपलब्ध करून देण्यात आली आहे. विद्यार्थ्यांना कोणतीही समस्या आल्यास अधिकृत ईमेल आणि हेल्पलाइन क्रमांकाद्वारे थेट एनटीएशी संपर्क साधता येणार आहे.
एनटीएने यासाठी neet-ug@nta.ac.in हा अधिकृत ईमेल आयडी आणि ०११-४०७५९००० हा हेल्पलाइन क्रमांक जारी केला आहे. विद्यार्थ्यांनी वेळोवेळी अधिकृत संकेतस्थळ तपासत राहावे, असेही आवाहन करण्यात आले आहे.
°°°°°