ईपीएफओकडून पीएफ सेटलमेंट प्रक्रिया अधिक सुलभ करण्यासाठी मोठे बदल करण्यात येणार असून लवकरच अंतिम पीएफ सेटलमेंट ऑटोमेटेड होणार आहे. तसेच एटीएम आणि यूपीआयद्वारे पीएफ पैसे काढण्याची सुविधाही सुरू होण्याची शक्यता आहे.
नवी दिल्ली : कर्मचारी भविष्य निधी संघटना म्हणजेच Employees' Provident Fund Organisation आपल्या ७ कोटींपेक्षा अधिक सदस्यांसाठी मोठे बदल करण्याच्या तयारीत आहे. पीएफ क्लेम सेटलमेंट प्रक्रिया अधिक वेगवान आणि सुलभ करण्यासाठी आता अंतिम पीएफ सेटलमेंटही ऑटोमेटेड करण्याची तयारी सुरू झाली आहे. या बदलामुळे नोकरी सोडल्यानंतर पीएफची संपूर्ण रक्कम सदस्यांच्या बँक खात्यात जलदगतीने जमा होण्याचा मार्ग मोकळा होणार आहे.
सध्या ईपीएफओकडून पाच लाख रुपयांपर्यंतच्या अंशतः किंवा आगाऊ पीएफ दाव्यांचे ऑटोमेटेड सेटलमेंट केले जाते. या प्रक्रियेसाठी दावा दाखल केल्यानंतर तीन दिवसांची मुदत निश्चित करण्यात आली आहे. मात्र आता अंतिम पीएफ क्लेम सेटलमेंटलाही स्वयंचलित प्रणालीशी जोडण्याचा निर्णय घेतला जात असल्याने सदस्यांना दीर्घ प्रतीक्षा करावी लागणार नाही.
प्राप्त माहितीनुसार, ईपीएफओमधील वरिष्ठ अधिकाऱ्यांनी या बदलाची माहिती दिली आहे. नवीन कामगार संहितेवर आयोजित राष्ट्रीय परिसंवादात बोलताना केंद्रीय भविष्य निधी आयुक्त रमेश कृष्णमूर्ती यांनी सांगितले की, शक्य तितक्या प्रक्रियांना स्वयंचलित करण्याचा ईपीएफओचा प्रयत्न सुरू आहे. आतापर्यंत ही सुविधा केवळ आगाऊ निधी काढण्यासाठी उपलब्ध होती, मात्र लवकरच अंतिम पीएफ सेटलमेंटसाठीही ऑटोमेटेड प्रक्रिया लागू केली जाऊ शकते.
याशिवाय नोकरी बदलल्यानंतर पीएफ खाते हस्तांतरण प्रक्रियाही अधिक सुलभ करण्यात येणार आहे. सदस्यांनी स्वतंत्र फॉर्म भरण्याची आवश्यकता राहणार नसून पीएफ खाते नव्या सदस्य खात्यात आपोआप हस्तांतरित करण्यासाठी प्रणाली विकसित केली जात आहे. त्यामुळे कर्मचारी आणि नियोक्ता या दोघांचाही वेळ वाचणार असून प्रक्रिया अधिक पारदर्शक होणार आहे.
ईपीएफओकडून नव्या कायदेशीर चौकटीअंतर्गत ईपीएफ योजना १९५२, कर्मचारी विमा योजना १९७६ आणि कर्मचारी पेन्शन योजना १९९५ यांनाही पुन्हा अधिसूचित केले जाणार आहे. अलीकडेच केंद्रीय विश्वस्त मंडळाने मंजूर केलेल्या विविध सुधारणांचा यात समावेश करण्यात आला आहे. विशेषतः पीएफ निधी काढण्याची प्रक्रिया अधिक सोपी आणि जलद करण्यावर भर देण्यात आला आहे.
या कार्यक्रमात केंद्रीय कामगार सचिव वंदना गुरनानी यांनीही उद्योग क्षेत्राला कामगारांशी न्याय करण्याचे आवाहन केले. सुधारणा केवळ नियमांचे पालन म्हणून न पाहता आनंदी, निरोगी आणि उत्पादक कर्मचारीवर्ग तयार करण्यासाठी त्याचा उपयोग व्हावा, असे त्यांनी नमूद केले.
दरम्यान, ईपीएफओशी संबंधित आणखी एक महत्त्वपूर्ण अपडेट समोर आले आहे. ईपीएफओ सदस्यांना लवकरच एटीएम आणि यूपीआयद्वारे थेट पीएफ रक्कम काढण्याची सुविधा उपलब्ध होण्याची शक्यता आहे. ही सुविधा ईपीएफओ ३.० अपग्रेडचा भाग असणार असून मे महिन्याच्या अखेरीस ती सुरू होण्याची शक्यता व्यक्त केली जात आहे. नव्या प्रणालीअंतर्गत ईपीएफओकडून विशेष एटीएम कार्ड जारी केले जाऊ शकतात. त्यामुळे सदस्यांना कार्यालयात न जाता किंवा अतिरिक्त कागदपत्रांशिवाय थेट पीएफ रक्कम काढणे शक्य होणार आहे.
°°°°°