इराणने सऊदी अरेबियातील अमेरिकन तळावर मिसाईल आणि ड्रोन हल्ला केल्याची माहिती समोर आली असून अनेक सैनिक जखमी झाल्याने तणाव वाढला आहे.
नवी दिल्ली: मध्यपूर्वेत वाढत्या तणावाच्या पार्श्वभूमीवर इराण आणि अमेरिकेदरम्यान संघर्ष अधिक तीव्र होत असल्याचे चित्र समोर येत आहे. २८ फेब्रुवारी २०२६ रोजी इस्रायल आणि अमेरिकेकडून इराणवर करण्यात आलेल्या कारवाईनंतर सुरू झालेला संघर्ष आता अधिक धोकादायक टप्प्यावर पोहोचला असून दोन्ही देशांमध्ये थेट लष्करी चकमकी सुरू असल्याचे वृत्त आहे.
या पार्श्वभूमीवर अमेरिकेने ६ एप्रिलपर्यंत युद्धबंदीचा प्रस्ताव जाहीर केला असून त्यासाठी चर्चाही सुरू असल्याचे सांगितले जात आहे. मात्र इराणने युद्धबंदीपूर्वी काही अटी मांडल्या असून त्या पूर्ण होईपर्यंत मागे हटणार नसल्याची भूमिका स्पष्ट केली आहे. त्यामुळे परिस्थिती अधिकच गुंतागुंतीची बनली आहे.
दरम्यान, इराणकडून सऊदी अरेबियातील प्रिन्स सुलतान एअरबेसवर मोठा मिसाईल आणि ड्रोन हल्ला करण्यात आल्याची माहिती समोर आली आहे. या हल्ल्यात अमेरिकेच्या लष्कराला लक्ष्य करण्यात आले असून किमान १२ हून अधिक सैनिक जखमी झाल्याचे सांगितले जात आहे. त्यापैकी दोन जणांची प्रकृती गंभीर असल्याचेही वृत्त आहे.
या हल्ल्यात अमेरिकेच्या वायूसेनेच्या रिफ्यूलिंग एअरक्राफ्टचे मोठे नुकसान झाले आहे. विशेषतः बोइंग केसी-१३५ स्ट्रॅटोटँकर या विमानाचे नुकसान झाल्याने अमेरिकेच्या लष्करी कारवायांवर परिणाम होण्याची शक्यता व्यक्त केली जात आहे. हल्ल्यानंतर प्रसिद्ध झालेल्या उपग्रह छायाचित्रांमधून नुकसानाची तीव्रता स्पष्ट होत असल्याचे सांगितले जात आहे.
इराणने यापूर्वीच इशारा दिला होता की, ज्या ठिकाणी अमेरिकेची लष्करी उपस्थिती आहे, त्या सर्व ठिकाणी लक्ष्य केले जाईल. त्यानुसारच हा हल्ला करण्यात आल्याचे मानले जात आहे. या संघर्षात आतापर्यंत अमेरिकेचे ३०० हून अधिक सैनिक जखमी झाले असून १३ जणांचा मृत्यू झाल्याची माहिती समोर आली आहे.
युद्ध सुरू झाल्यानंतर परिस्थिती इतकी गंभीर होईल, याचा अंदाज अमेरिकेला सुरुवातीला नव्हता, असे निरीक्षण व्यक्त केले जात आहे. मात्र आता संघर्ष अधिकच तीव्र होत असून मध्यपूर्वेतील स्थैर्यावर गंभीर परिणाम होण्याची भीती व्यक्त केली जात आहे. अमेरिकेतही या हल्ल्यानंतर मोठी खळबळ उडाली असून पुढील धोरण काय असणार, याकडे जगाचे लक्ष लागले आहे.
------------------------------