ए.आर. रहमान वादाच्या पार्श्वभूमीवर ममता कुलकर्णीचा मोठा खुलासा; आमिर खान, शाहरुख खानसोबतचे अनुभव सांगत ९०च्या दशकातील बॉलिवूडचं वास्तव उघड.
मुंबई: संगीतकार ए.आर. रहमान यांच्या अलीकडील वक्तव्यानंतर देशभरात सुरू झालेल्या वादाच्या पार्श्वभूमीवर आता बॉलिवूडच्या १९९० च्या दशकातील वातावरणावर पुन्हा चर्चा सुरू झाली आहे. या चर्चेला नवा आयाम दिला आहे तो पूर्व अभिनेत्री ममता कुलकर्णी हिने केलेल्या स्पष्ट आणि बेधडक वक्तव्याने. एका मुलाखतीदरम्यान ममता कुलकर्णीने बॉलिवूडमधील जुन्या आठवणींना उजाळा देत आमिर खान आणि शाहरुख खान यांच्यासोबतच्या अनुभवांबद्दल भाष्य केलं असून, त्या काळात इंडस्ट्रीत धर्म, वैयक्तिक सीमा किंवा तथाकथित सांप्रदायिकतेपेक्षा माणुसकी आणि आपुलकीच जास्त महत्त्वाची होती, असं ती सांगते.
ममता कुलकर्णीने १९९० च्या दशकातील शूटिंगच्या काळाबद्दल बोलताना सांगितलं की, आज जशा सुविधा कलाकारांना उपलब्ध आहेत, तशा त्या वेळी नव्हत्या. व्हॅनिटी व्हॅन, वैयक्तिक बदलण्याच्या खोल्या किंवा आलिशान सेट्स हे अपवादात्मक होते. त्यामुळे कलाकार एकमेकांच्या घरांवरच अवलंबून असायचे. ‘बाजी’ चित्रपटाच्या शूटिंगदरम्यान आमिर खानच्या लोखंडवाला येथील घरात आम्ही जायचो. त्या वेळी आमिर माझ्या बेडरुममध्ये येऊन कपडे बदलायचा आणि शूटिंग पॅकअपनंतर त्याच्याच किचनमध्ये आम्ही चहा बनवायचो, अशी आठवण ममताने सांगितली. या वक्तव्यामुळे सोशल मीडियावर मोठी चर्चा रंगली आहे.
ममता कुलकर्णीने स्पष्ट केलं की, त्या काळात कलाकारांमध्ये धर्माचा विचार कधीच केला जात नव्हता. आमिर खान, शाहरुख खान यांच्यासोबत काम करताना कधीच हिंदू-मुस्लिम असा भेद जाणवला नाही. आम्ही एकत्र वर्ल्ड टूरला जायचो, एकमेकांच्या घरी बसायचो, कोणी चहा करायचं, कोणी जेवण बनवायचं, सगळं अगदी कुटुंबासारखं असायचं, असं ममता म्हणाली. आजच्या काळात ज्या प्रकारे इंडस्ट्रीत विभागणी, ट्रोलिंग आणि आरोप-प्रत्यारोप सुरू आहेत, त्याच्या तुलनेत त्या काळातील बॉलिवूड जास्त एकसंध होतं, असं तिचं मत आहे.
ए.आर. रहमान यांच्या वक्तव्यावर भाष्य करताना ममता कुलकर्णीने थेट नाव न घेता पण स्पष्ट शब्दांत मत मांडलं. ती म्हणाली की, बॉलिवूडमध्ये तिचा अनुभव पूर्णपणे वेगळा होता आणि ज्या इंडस्ट्रीला ती ओळखत होती, ती कधीच अशी विभागलेली नव्हती. प्रत्येक गोष्टीची एक वेळ असते आणि कदाचित आजच्या काळात काही प्रकारचं संगीत किंवा विचार प्रासंगिक राहिलेलं नसेल, असं सूचक विधान तिने केलं. आज अनेक प्रतिभावान गायक आणि कलाकार कामाविना घरी बसले आहेत, याकडेही तिने लक्ष वेधलं.
ममता कुलकर्णीच्या या वक्तव्यामुळे ए.आर. रहमान वादाला नवं वळण मिळालं असून, बॉलिवूडमधील बदलतं सामाजिक आणि सांस्कृतिक वातावरण पुन्हा चर्चेच्या केंद्रस्थानी आलं आहे. ९०च्या दशकातील बॉलिवूड विरुद्ध आजचं बॉलिवूड, हा मुद्दा पुन्हा उफाळून आला असून, ममता कुलकर्णीने सांगितलेलं ‘इंडस्ट्रीतलं मोठं सत्य’ अनेकांना अंतर्मुख करणारं ठरत आहे.
----------------------------------------------------