जोधपूरमधील युवा साध्वी प्रेम बाईसा यांच्या संशयास्पद मृत्यू प्रकरणात नवे प्रश्न; इंजेक्शन, सुसाइड नोट, व्हायरल व्हिडिओ आणि वडिलांच्या भूमिकेवर संशय.
जोधपूर : राजस्थानमधील जोधपूर येथे २५ वर्षीय युवा साध्वी प्रेम बाईसा यांच्या संशयास्पद मृत्यूनंतर तीन दिवस उलटून गेले असले तरी या प्रकरणातील रहस्य अधिकच गडद होत चालले आहे. इंजेक्शन दिल्यानंतर अवघ्या काही सेकंदांत प्रकृती बिघडणे, मृत्यूनंतर तीन तासांनी इंस्टाग्रामवर पोस्ट झालेला कथित सुसाइड नोट, पोस्टमॉर्टमवरून निर्माण झालेला वाद आणि याआधी व्हायरल झालेला खासगी व्हिडिओ या सर्व बाबींमुळे आता या प्रकरणात साध्वींचे वडील आणि गुरु वीरमनाथ यांची भूमिकाही प्रश्न निर्माण करत आहे.
२८ जानेवारीच्या सायंकाळी साध्वी प्रेम बाईसा यांची प्रकृती अचानक गंभीर झाली. आजारी असताना डॉक्टरकडे जाण्याऐवजी त्यांनी एका कंपाउंडरकडून इंजेक्शन घेतल्याचे समोर आले आहे. हे इंजेक्शन दिल्यानंतर अवघ्या ३० सेकंदांत त्यांची तब्येत इतकी खालावली की त्यांना तातडीने जोधपूरच्या प्रेक्षा रुग्णालयात नेण्यात आले. मात्र, रुग्णालयात पोहोचण्यापूर्वीच त्यांचा मृत्यू झाल्याचे डॉक्टरांनी घोषित केले.
या घटनेनंतर सर्वात मोठा धक्का बसला तो मृत्यूनंतर साधारण तीन तासांनी साध्वींच्या अधिकृत इंस्टाग्राम खात्यावर पोस्ट झालेल्या कथित सुसाइड नोटमुळे. या पोस्टमध्ये ‘मला जिवंतपणी न्याय मिळाला नाही, पण मृत्यूनंतर तरी मिळेल’ असा उल्लेख करण्यात आला आहे. ही पोस्ट साध्वींच्या वडिलांच्या सांगण्यावरून टाकण्यात आल्याचे त्यांनी स्वतः मान्य केले आहे. मात्र, प्रश्न असा आहे की, मुलीच्या मृत्यूनंतर इतक्या कमी वेळात हा मजकूर कुठून आला आणि तो पोस्ट करण्याची घाई का झाली?
या प्रकरणात आणखी संशय निर्माण करणारी बाब म्हणजे सुरुवातीला साध्वींच्या वडिलांनी पोस्टमॉर्टमला विरोध केल्याचा दावा. साध्वींचे अनुयायी आणि अनेक नागरिक मृत्यूचे सत्य समोर यावे, यासाठी शवविच्छेदनाची मागणी करत असताना वडिलांनी त्यास नकार दिल्याचे बोलले जात आहे. नंतर पोलिसांनी पोस्टमॉर्टम करून मृतदेह कुटुंबीयांच्या ताब्यात दिला आणि त्यांच्या मूळ गावी साध्वींना समाधी देण्यात आली. मात्र, पोस्टमॉर्टम अहवाल अजूनही अंतिम तपासासाठी महत्त्वाचा ठरणार आहे.
या मृत्यूमागे नेमके कारण काय, याचा शोध घेत असताना तपास यंत्रणांचे लक्ष इंजेक्शनच्या प्रकाराकडे वळले आहे. कोणते इंजेक्शन, कोणाच्या सल्ल्याने आणि कोणत्या परिस्थितीत देण्यात आले, हे प्रश्न अद्याप अनुत्तरित आहेत. जर तपासात कोणतेही विषारी अथवा धोकादायक द्रव्य वापरण्यात आल्याचे निष्पन्न झाले, तर संपूर्ण तपासाची दिशा बदलू शकते.
या प्रकरणाला वेगळे वळण देणारा आणखी एक मुद्दा म्हणजे साध्वी प्रेम बाईसा यांचा जुलै २०२५ मध्ये व्हायरल झालेला खासगी व्हिडिओ. हा व्हिडिओ जोधपूरमधील कुटीर आश्रमातील असल्याचा दावा करण्यात आला होता. व्हिडिओमध्ये दिसणारी व्यक्ती ही साध्वींचे गुरु आणि वडील समजले जाणारे वीरमनाथ असल्याचे समोर आले होते. या व्हिडिओमुळे साध्वींच्या वैयक्तिक आयुष्यावर आणि आश्रमाच्या प्रतिमेवर मोठा परिणाम झाला होता.
त्या वेळी साध्वी प्रेम बाईसा यांनी आपण बदनामीच्या कटाचा बळी असल्याचा आरोप करत आश्रमातील काही लोकांविरोधात एफआयआर दाखल केला होता. सीसीटीव्ही फुटेज चोरून ते व्हायरल केल्याचा आणि बदनामी थांबवण्यासाठी २० लाख रुपयांची मागणी केल्याचा आरोप त्यांनी केला होता. या घटनेनंतर साध्वी मानसिक तणावात असल्याचेही त्यांनी कबूल केले होते आणि आपली निरपराधिता सिद्ध करण्यासाठी अग्निपरीक्षेची तयारी असल्याचेही त्यांनी सांगितले होते.
आता मृत्यूनंतर समोर आलेल्या कथित सुसाइड नोटमध्येही या बदनामीचा अप्रत्यक्ष उल्लेख आढळतो. त्यामुळे साध्वींचा मृत्यू हा आत्महत्येचा प्रकार आहे की वैद्यकीय निष्काळजीपणा, की यामागे आणखी काही कट आहे, याबाबत संभ्रम कायम आहे. सोशल मीडियावर पोस्ट झालेला मजकूर खरोखर साध्वींचाच आहे का, की मृत्यूनंतर कोणीतरी तो टाकला, हा प्रश्नही तपासाचा केंद्रबिंदू ठरला आहे.
साध्वींचे वडील वीरमनाथ यांच्यावर संशय व्यक्त केला जात असला तरी त्यांनी आपली बाजू मांडताना निष्पक्ष चौकशीची मागणी केली आहे. आपल्या मुलीला न्याय मिळावा, हीच आपली भूमिका असल्याचे त्यांनी स्पष्ट केले आहे. मात्र, मृत्यूनंतर घडलेल्या घटनांच्या वेळेचा मेळ, निर्णयांची घाई आणि अनेक अनुत्तरित प्रश्न यामुळे ही केस अधिकच गुंतागुंतीची बनली आहे.
पोलीस तपास सध्या पोस्टमॉर्टम अहवाल, इंजेक्शनचे तपशील, सोशल मीडिया पोस्ट आणि याआधीच्या ब्लॅकमेलिंग प्रकरणाशी संबंधित पुराव्यांवर केंद्रित आहे. हे सर्व धागेदोरे एकत्र आल्यावरच साध्वी प्रेम बाईसा यांच्या मृत्यूचे खरे कारण समोर येईल. तोपर्यंत ही ‘डेथ मिस्ट्री’ राजस्थानसह देशभरात चर्चेचा विषय ठरत राहणार आहे.
---------------------------------------------