बॉलिवूडमधील अनेक अभिनेत्री त्यांच्या सौंदर्य आणि अभिनयाने प्रेक्षकांच्या मनावर अधिराज्य गाजवतात, पण काही अभिनेत्री त्यांच्या वैयक्तिक आयुष्यामुळेही नेहमी चर्चेत राहतात. त्यापैकीच एक नाव म्हणजे सुष्मिता सेन. १९९४ मध्ये ‘मिस युनिव्हर्स’चा किताब जिंकून भारताचे नाव जागतिक पातळीवर उज्ज्वल करणाऱ्या या अभिनेत्रीच्या आयुष्यात प्रेमाने ११ वेळा दार ठोठावले, पण एकही नातं टिकू शकलं नाही. आज ४९ वर्षांच्या सुष्मिता सेनने विवाह केला नाही आणि ती आपल्या दोन दत्तक मुलींसह एकटीच जीवन जगत आहे.
१९९६ मध्ये महेश भट्ट दिग्दर्शित ‘दस्तक’ चित्रपटातून सुष्मिताने बॉलिवूडमध्ये पदार्पण केलं. या चित्रपटाच्या सेटवर तिची भेट सहाय्यक दिग्दर्शक विक्रम भट्ट यांच्याशी झाली आणि तिथूनच त्यांच्या नात्याची सुरुवात झाली. काही वर्षे त्यांनी एकमेकांना डेट केले, मात्र हे नातं टिकलं नाही.
यानंतर सुष्मिताचं नाव उद्योगपती संजय नारंग, अभिनेता रणदीप हुडा आणि इम्तियाज खत्री यांच्याशी जोडले गेले. एका काळात हॉटमेलचे संस्थापक सबीर भाटिया आणि सुष्मिता यांचं नातंही चर्चेत आलं होतं.
इतकंच नाही, तर माजी पाकिस्तानी क्रिकेटपटू वसीम अक्रमसोबत तिचं नाव जोडल्याच्या चर्चा रंगल्या होत्या. दोघे एका टॉक शोमध्ये एकत्र दिसले होते, त्यानंतर त्यांच्या नात्याच्या अफवा पसरल्या, मात्र हे नातं फार काळ टिकलं नाही.
सुष्मिता सेनच्या वैयक्तिक आयुष्यातील सर्वात चर्चित नातं उद्योगपती ललित मोदी यांच्यासोबतचं होतं. ललित मोदी यांनी सोशल मीडियावर सुष्मितासोबतचे फोटो शेअर करून आपल्या आयुष्याच्या नव्या अध्यायाची घोषणा केली होती. मात्र काही दिवसांतच त्यांनी ते फोटो डिलीट केले आणि या नात्याचा शेवट झाला.
यानंतर मॉडेल आणि अभिनेता रोहमन शॉल तिच्या आयुष्यात आला. दोघे अनेक वर्षे एकत्र राहिले, पण अखेरीस त्यांनी ब्रेकअपची घोषणा केली. तरीही आजही सुष्मिता आणि रोहमन चांगले मित्र आहेत आणि विशेष प्रसंगी एकत्र दिसतात.
सुष्मिता सेनने आपल्या आयुष्यातील प्रत्येक नातं खुलेपणाने स्वीकारलं. अनेक वेळा नाती तुटली, प्रेम संपलं, पण तिचा आत्मविश्वास आणि स्वाभिमान मात्र कायम राहिला. आज ती सिंगल असली तरी ती स्वतःच्या अटींवर जगते आणि तिचं आयुष्य अनेक महिलांसाठी प्रेरणादायी ठरलं आहे.
–-----------------------------------------------------------------------------------------------------------------