माजी CJI चंद्रचूड यांच्या टिप्पणीवरून अयोध्या निकालाला आव्हान!
वकिलाला कोर्टाने ठोठावला तब्बल ६ लाखांचा दंड!
दिल्ली | अयोध्या प्रकरणातील सर्वोच्च न्यायालयाच्या ऐतिहासिक निकालाला आव्हान देणाऱ्या वकील महमूद प्राचा यांना दिल्लीतील न्यायालयाने चांगलाच दणका दिला आहे. त्यांनी दाखल केलेली याचिका “तुच्छ, चुकीच्या समजुतीवर आधारित आणि न्यायिक प्रक्रियेचा गैरवापर करणारी” असल्याचे सांगत पटियाला हाऊस कोर्टाने त्यांच्यावर ६ लाख रुपयांचा दंड ठोठावला आहे.
महमूद प्राचा यांनी त्यांच्या याचिकेत २०१९ च्या सर्वोच्च न्यायालयाच्या अयोध्या मंदिराशी संबंधित निकालाला रद्दबातल घोषित करण्याची मागणी केली होती. या याचिकेला खालच्या न्यायालयाने आधीच फेटाळले होते. त्यानंतर प्राचा यांनी तो आदेश जिल्हा न्यायालयात आव्हान दिला होता, मात्र न्यायालयाने त्यांना खडे बोल सुनावले आणि दंडाची रक्कम आणखी वाढवली.
प्राचा यांनी त्यांच्या याचिकेत दावा केला की, भारताचे माजी सरन्यायाधीश डी. वाय. चंद्रचूड, जे अयोध्या प्रकरणाच्या निर्णय देणाऱ्या पाच न्यायाधीशांच्या खंडपीठात होते, यांनी गेल्या वर्षी एका भाषणात असे सूचित केले होते की अयोध्या निकाल हा “भगवान श्रीराम लला विराजमान यांनी दिलेल्या उपायावर आधारित” होता.
मात्र न्यायालयाने हे सर्व स्पष्ट करताना म्हटले की, न्यायमूर्ती चंद्रचूड यांनी त्यांच्या भाषणात फक्त “देवाकडे मार्गदर्शनासाठी प्रार्थना केली” असे म्हटले होते, आणि त्यांनी कोणत्याही पक्षाकडून कोणताही उपाय घेतला नव्हता. त्यामुळे वकिलाने देव (God) आणि कायदेशीर व्यक्तिमत्व (Juristic Personality) म्हणजेच न्यायालयीन मान्यता प्राप्त देवता यांच्यातील फरक समजून न घेता चुकीचा दावा केला आहे.
पटियाला हाऊस कोर्टाचे जिल्हा न्यायाधीश धर्मेंद्र राणा यांनी निरीक्षणात म्हटले की, प्राचा यांचा खटला कायद्याचा अपमान करणारा आणि न्यायिक प्रक्रियेचा दुरुपयोग करणारा आहे. त्यांनी म्हटले, “ही याचिका केवळ न्यायालयाचा वेळ वाया घालवण्यासाठी दाखल करण्यात आली असून, अशी प्रवृत्ती रोखण्यासाठी कठोर दंडांची गरज आहे.”
न्यायालयाने पुढे स्पष्ट केले की, न्यायाधीशांविरुद्ध अशा प्रकारे दिवाणी कारवाई करता येत नाही, कारण न्यायाधीश (संरक्षण) अधिनियम, १९८५ अंतर्गत त्यांना कायदेशीर संरक्षण आहे. न्यायालयाने म्हटले की, “अशा प्रकारच्या खटल्यांमुळे न्यायव्यवस्थेचा गौरव कमी होतो आणि सार्वजनिक विश्वासाला धक्का बसतो.”
शेवटी, न्यायालयाने कनिष्ठ न्यायालयाचा निर्णय कायम ठेवत, प्राचा यांची याचिका पूर्णपणे फेटाळून लावली आणि त्यांच्यावर एकूण ६ लाख रुपयांचा दंड कायम ठेवला.
माजी CJI चंद्रचूड यांच्या टिप्पणीवरून अयोध्या निकालाला आव्हान!