मुख्यमंत्री फडणवीस यांनी जाहीर केली रणनिती
पुणे : महापालिका निवडणुकीच्या तोंडावर भाजपने आपली दिशा स्पष्ट केली आहे. “कोणताही स्ट्राँग उमेदवार आला तर त्याला भाजपमध्ये घेणार,” असं स्पष्ट वक्तव्य मुख्यमंत्री देवेंद्र फडणवीस यांनी करून भाजपच्या निवडणूक रणनितीची झलक दाखवली आहे.
पुण्यात पश्चिम महाराष्ट्रातील सर्व शहरांच्या भाजप प्रमुखांची बैठक फडणवीसांच्या उपस्थितीत पार पडली. या बैठकीत आगामी स्थानिक स्वराज्य संस्था निवडणुका जिंकण्यासाठीचा मेगा प्लॅन सादर करण्यात आला. मुख्यमंत्री फडणवीस यांनी कार्यकर्त्यांना स्पष्ट संदेश दिला की, “भाजपचे दरवाजे सक्षम, जनाधार असलेल्या उमेदवारांसाठी खुले आहेत.”
त्याचबरोबर त्यांनी सांगितले की, भाजपचे कार्यकर्ते हे नव्याने आलेल्या लोकांना सामावून घेतात. “काही ठिकाणी नाराजी असली तरी कार्यकर्ते समजून घेतात. निवडणुकीत विजय हेच आपलं अंतिम ध्येय असलं पाहिजे,” असं आवाहन त्यांनी कार्यकर्त्यांना केलं.
फडणवीसांच्या या वक्तव्यामुळे भाजपमध्ये इनकमिंगची लाट येण्याची शक्यता व्यक्त केली जात आहे. दरम्यान, पुणे महापालिका निवडणुकीसाठी भाजपने संघटनात्मक तयारीला वेग दिला असून, प्रमुख नेत्यांच्या बैठकींना गती मिळाली आहे.
Chief Minister Fadnavis announced the strategy