प्रसिद्ध कीर्तनकार इंदुरीकर महाराज यांच्या कन्या ज्ञानेश्वरी यांच्या विवाहसोहळ्याची राज्यभर चर्चा रंगली आहे. शाही आयोजनावरून टीका होत असतानाच मराठमोळ्या व सात्विक जेवणाच्या व्यवस्थेमुळे महाराजांचे कौतुकही होत आहे.
अहिल्यानगर : प्रसिद्ध कीर्तनकार आणि समाजप्रबोधनकार निवृत्ती महाराज देशमुख उर्फ इंदुरीकर महाराज यांच्या कन्या ज्ञानेश्वरी देशमुख यांचा विवाहसोहळा संगमनेर तालुक्यातील गुंजाळवाडी येथे मोठ्या थाटामाटात पार पडला. उद्योजक सुनील विष्णू चिलप यांचे सुपुत्र साहिल चिलप यांच्यासोबत ज्ञानेश्वरी यांचा विवाह संपन्न झाला. या शाही विवाहसोहळ्याला राज्यातील राजकीय, सामाजिक आणि धार्मिक क्षेत्रातील अनेक मान्यवरांनी उपस्थिती लावल्याने संपूर्ण राज्यात या लग्नाची चर्चा रंगली आहे.
मुख्यमंत्री देवेंद्र फडणवीस, उपमुख्यमंत्री एकनाथ शिंदे, राजस्थानचे राज्यपाल हरिभाऊ बागडे, काँग्रेस नेते बाळासाहेब थोरात, मंत्री छगन भुजबळ, मंत्री राधाकृष्ण विखे पाटील यांच्यासह अनेक दिग्गज या विवाहसोहळ्यासाठी उपस्थित होते. सुमारे १०० एकर परिसरात उभारण्यात आलेल्या भव्य मंडपात हा विवाहसोहळा पार पडला. हजारो लोकांनी या सोहळ्यासाठी गर्दी केली होती. पाहुण्यांच्या स्वागतापासून ते व्यवस्थापनापर्यंत प्रत्येक बाबतीत विशेष लक्ष देण्यात आल्याचे पाहायला मिळाले.
मात्र या भव्य आयोजनावरून इंदुरीकर महाराज पुन्हा एकदा टीकेच्या केंद्रस्थानी आले आहेत. काही महिन्यांपूर्वी त्यांच्या मुलीच्या साखरपुड्यावरून सोशल मीडियावर मोठ्या प्रमाणावर टीका झाली होती. साधेपणाने विवाह करण्याचा संदेश देणारे महाराज स्वतःच्या मुलीच्या कार्यक्रमात मोठा खर्च करत असल्याचा आरोप त्यांच्यावर करण्यात आला होता. आता विवाहसोहळ्यानंतरही अशाच प्रकारच्या चर्चा पुन्हा रंगू लागल्या आहेत.
या पार्श्वभूमीवर विवाहसोहळ्यात बोलताना इंदुरीकर महाराजांनी आपल्या टीकाकारांना थेट उत्तर दिले. “जशी साखरपुड्याची चर्चा महिनाभर झाली, तशी या विवाहाची चर्चा वर्षभर होईल,” असा टोला त्यांनी लगावला. परिस्थिती चांगली असेल तर प्रत्येकाने आपल्या मुलामुलींचा विवाह आनंदात करावा, असे मतही त्यांनी व्यक्त केले.
लग्नातील खर्चाबाबत स्पष्टीकरण देताना इंदुरीकर महाराज म्हणाले की, या विवाहातील जवळपास ९० टक्के खर्च त्यांच्या भक्तमंडळाने उचलला आहे. “देणाऱ्यांनी प्रेमाने दिलं आहे, त्यामुळे ट्रोल करण्याचा कोणालाही अधिकार नाही,” असे स्पष्ट शब्दांत त्यांनी सांगितले. तसेच आपण विद्यालय चालवत असून तेथे एक रुपयाही घेत नसल्याचे त्यांनी नमूद केले.
दरम्यान, या शाही विवाहसोहळ्यातील एका गोष्टीने मात्र टीकाकारांनाही प्रभावित केले. इंदुरीकर महाराजांनी लग्नात पूर्णपणे मराठमोळे आणि सात्विक जेवण ठेवत पारंपरिक संस्कृती जपण्याचा प्रयत्न केला. “मी लग्नात मठ्ठा किंवा गुलाबजाम ठेवला नाही,” असे त्यांनी स्वतः सांगितले. आधुनिक आणि दिखाऊ मेनूऐवजी पारंपरिक महाराष्ट्रीयन खाद्यपदार्थांना प्राधान्य दिल्याने सोशल मीडियावर अनेकांनी त्यांच्या या निर्णयाचे कौतुक केले.
विवाहसोहळ्यादरम्यान इंदुरीकर महाराज भावनिक झाल्याचेही पाहायला मिळाले. कीर्तनसेवेच्या धावपळीत मुलांशी पुरेसा वेळ घालवता आला नसल्याची खंत त्यांनी व्यक्त केली. “माझ्या मुलाचीदेखील तीन वर्षांपासून भेट झाली नाही,” असे सांगताना त्यांनी कुटुंबाबद्दलच्या भावना व्यक्त केल्या.
गेल्या वर्षी झालेल्या साखरपुड्यानंतर सोशल मीडियावर झालेल्या टीकेमुळे आपण मानसिकदृष्ट्या त्रस्त झालो होतो, अशी कबुलीही त्यांनी यावेळी दिली. त्या काळात कीर्तनसेवा थांबवण्याचाही विचार मनात आल्याचे त्यांनी सूचित केले होते. मात्र आता पुन्हा मोठ्या उत्साहात आणि जल्लोषात पार पडलेल्या या विवाहसोहळ्यामुळे इंदुरीकर महाराज राज्यभर चर्चेत आले आहेत.
°°°°°