अमेरिका-इराण शस्त्रसंधीमुळे भारताला मोठा दिलासा; अडकलेली जहाजे सुटणार, एलपीजी व कच्च्या तेलाचा पुरवठा सुरळीत होणार, भारतीयांची सुरक्षा वाढणार.
नवी दिल्ली: पश्चिम आशियातील तणावात घट झाल्यामुळे भारतासाठी मोठी सकारात्मक घडामोड समोर आली आहे. अमेरिका आणि इराण यांच्यात झालेल्या १४ दिवसांच्या शस्त्रसंधीमुळे आखातातील परिस्थिती काही प्रमाणात स्थिर झाली असून त्याचा थेट फायदा भारताला होणार आहे. या घडामोडींमुळे भारताच्या ऊर्जा सुरक्षेवरील तातडीचा धोका कमी झाला असून खाडी देशांमध्ये राहणाऱ्या कोट्यवधी भारतीयांच्या सुरक्षेबाबतही दिलासा मिळाला आहे.
या संघर्षकाळात भारतासाठी सर्वात मोठी चिंता फारसचा आखात आणि होर्मुझ सामुद्रधुनी येथे अडकलेल्या मालवाहू जहाजांची होती. तणावपूर्ण वातावरणामुळे जहाज वाहतुकीवर मोठा परिणाम झाला होता आणि भारताची तब्बल १६ जहाजे या भागात अडकून पडली होती. मात्र, शस्त्रसंधीनंतर सुरक्षित मार्ग उपलब्ध झाल्यामुळे ही सर्व जहाजे आता टप्प्याटप्प्याने भारतीय किनाऱ्याकडे परतण्याची प्रक्रिया सुरू होणार आहे.
ऊर्जा क्षेत्राच्या दृष्टीनेही ही घडामोड महत्त्वाची मानली जात आहे. भारत मोठ्या प्रमाणावर खाडी देशांतून कच्चे तेल आणि नैसर्गिक वायू आयात करतो. युद्धामुळे या पुरवठ्यावर दबाव निर्माण झाला होता. मात्र, आता जहाजांची हालचाल पुन्हा सुरू होत असल्याने एलपीजी आणि कच्च्या तेलाचा पुरवठा सुरळीत होण्याची शक्यता वाढली आहे. यामुळे देशातील इंधन साठ्यांवरील ताण कमी होईल आणि किंमतींवर नियंत्रण ठेवण्यास मदत होऊ शकते, ज्याचा थेट फायदा सर्वसामान्य नागरिकांना होणार आहे.
याशिवाय खाडी देशांमध्ये राहणाऱ्या सुमारे एक कोटी भारतीयांच्या सुरक्षेच्या दृष्टीनेही ही शस्त्रसंधी अत्यंत महत्त्वाची ठरली आहे. गेल्या काही आठवड्यांतील संघर्षात भारतीय नागरिकांचे बळी गेल्याने चिंता वाढली होती. आता परिस्थिती नियंत्रणात येत असल्याने हवाई सेवा पुन्हा सुरू होण्याची प्रक्रिया सुरू झाली आहे, ज्यामुळे इच्छुक भारतीयांना मायदेशी परतण्याचा मार्ग मोकळा होईल.
दरम्यान, इराण मध्ये सध्या सुमारे ७५०० भारतीय अडकले असल्याची माहिती समोर आली आहे. शस्त्रसंधीच्या काळात त्यांची सुरक्षित सुटका करण्यासाठी प्रयत्न वेगाने सुरू होण्याची शक्यता आहे. भारतासाठी हे १४ दिवस अत्यंत महत्त्वाचे मानले जात असून या कालावधीत परिस्थिती पूर्णपणे स्थिर करण्यावर भर दिला जाणार आहे. या सर्व घडामोडींमुळे पश्चिम आशियातील तणाव कमी होण्याच्या दिशेने पाऊल पडले असून भारतासाठी ऊर्जा, व्यापार आणि नागरिकांच्या सुरक्षेच्या दृष्टीने हा मोठा दिलासा ठरत आहे.
------------------------------------