फडणवीस-गडकरींच्या मध्यस्थीची चर्चा, कोण आहेत सारंग लखानी
सुप्रिया सुळे यांची मुलगी रेवती सुळे हिचं लग्न सारंग अरुण लखानी यांच्यासोबत ठरलं; फडणवीस-गडकरींच्या मध्यस्थीची राजकीय वर्तुळात चर्चा.
मुंबई: राष्ट्रवादी काँग्रेस शरद पवार गटाच्या खासदार सुप्रिया सुळे यांच्या कन्या रेवती सुळे यांचं लग्न ठरल्याची माहिती समोर आली असून, राज्याच्या राजकीय वर्तुळात याची जोरदार चर्चा सुरू झाली आहे. रेवती सुळे यांचं लग्न सारंग अरुण लखानी यांच्यासोबत निश्चित झालं असून, ही माहिती माजी केंद्रीय मंत्री सुशील कुमार शिंदे यांच्या कन्या स्मृती शिंदे यांनी सोशल मीडियावर पोस्टद्वारे दिली आहे.
या विवाहाची चर्चा केवळ कौटुंबिक पातळीवर मर्यादित न राहता राजकीय वर्तुळातही रंगताना दिसत आहे. सूत्रांकडून मिळालेल्या माहितीनुसार, रेवती सुळे आणि सारंग लखानी यांचं नातं जुळवून आणण्यात केंद्रीय मंत्री नितीन गडकरी आणि महाराष्ट्राचे मुख्यमंत्री देवेंद्र फडणवीस यांनी मध्यस्थी केल्याची चर्चा आहे. त्यामुळे हा विवाह राजकीय दृष्टिकोनातूनही महत्त्वाचा मानला जात आहे.
सारंग अरुण लखानी हे नागपूरचे रहिवासी असून, रेवती सुळे नागपूरची सून होणार आहेत. सारंग लखानी हे प्रसिद्ध उद्योगपती अरुण लखानी यांचे पुत्र आहेत. अरुण लखानी हे विश्वराज ग्रुपचे अध्यक्ष आणि व्यवस्थापकीय संचालक असून, उद्योगजगतात त्यांची ओळख मोठ्या उद्योजकांमध्ये केली जाते. विश्वराज ग्रुप विविध क्षेत्रांमध्ये कार्यरत असून नागपूर आणि विदर्भातील विकास प्रकल्पांमध्ये या समूहाचा सहभाग राहिला आहे.
सारंग अरुण लखानी यांची ओळख केवळ उद्योग क्षेत्रापुरती मर्यादित नाही. ते एक उत्कृष्ट बॅडमिंटनपटू म्हणूनही ओळखले जातात. त्यांनी विविध राष्ट्रीय आणि आंतरराष्ट्रीय बॅडमिंटन स्पर्धांमध्ये सहभाग घेतला असून क्रीडा क्षेत्रातही स्वतःची वेगळी ओळख निर्माण केली आहे. शिक्षण आणि क्रीडा क्षेत्रात सक्रिय असलेले सारंग लखानी हे तरुण उद्योजक म्हणूनही ओळखले जातात.
रेवती सुळे या सुप्रिया सुळे आणि सदानंद सुळे यांची कन्या असून, त्यांना विजय सुळे हा भाऊ आहे. रेवती सुळे यांनी लंडन स्कूल ऑफ इकॉनॉमिक्स या प्रतिष्ठित संस्थेतून आपलं उच्च शिक्षण पूर्ण केलं आहे. राजकारणापासून काहीसे दूर राहणाऱ्या रेवती सुळे यांनी नुकत्याच पार पडलेल्या बारामती लोकसभा निवडणुकीदरम्यान प्रथमच आपल्या आईसाठी सक्रिय प्रचार करत सार्वजनिक जीवनात सहभाग घेतला होता.
शरद पवार कुटुंबातील या विवाहाच्या बातमीमुळे राज्याच्या राजकीय आणि सामाजिक वर्तुळात चर्चांना उधाण आलं आहे. सध्या विवाहाच्या तारखेबाबत किंवा कार्यक्रमांबाबत अधिकृत घोषणा झालेली नसली, तरी लवकरच या संदर्भातील तपशील समोर येण्याची शक्यता व्यक्त केली जात आहे.
______