नवीन वर्ष २०२६ आता अवघ्या काही दिवसांवर येऊन ठेपले आहे. वास्तुशास्त्र आणि धार्मिक मान्यतांनुसार वर्षाच्या सुरुवातीलाच घरात सकारात्मक ऊर्जा निर्माण केली, तर तिचा प्रभाव संपूर्ण वर्षभर टिकून राहतो. यासाठी समुद्रमंथनातून प्राप्त झालेल्या १४ दिव्य रत्नांपैकी कोणतीही एक शुभ वस्तू घरात आणणे अत्यंत फलदायी मानले जाते. या वस्तू घरात ठेवल्यास दारिद्र्य, चिंता, कलह आणि नकारात्मक ऊर्जा दूर राहते, तसेच सुख, शांती आणि समृद्धी टिकून राहते, असे मानले जाते.
पौराणिक कथेनुसार देव आणि असुर यांच्यात झालेल्या समुद्रमंथनातून १४ अमूल्य रत्ने प्रकट झाली होती. त्यामध्ये पारिजात वृक्ष, अमृत कलश, ऐरावत हत्ती, पांचजन्य शंख आणि देवी लक्ष्मी यांचा समावेश आहे. पारिजात वृक्ष किंवा त्याची फुले घराच्या परिसरात किंवा घरात ठेवल्यास वातावरण पवित्र आणि प्रसन्न राहते. अमृत कलश भगवान धन्वंतरींसह प्रकट झाला होता, त्यामुळे नववर्षाच्या सुरुवातीला उत्तर दिशेला पाण्याने भरलेला कलश ठेवणे शुभ मानले जाते.
समुद्रमंथनातून मिळालेला ऐरावत हत्ती हा इंद्रदेवांचा वाहन असल्याने त्याचे प्रतीकात्मक रूप घरात ठेवल्यास घरावर वाईट नजरेचा प्रभाव होत नाही, अशी श्रद्धा आहे. भगवान विष्णूंनी धारण केलेला पांचजन्य शंख घरातील मंदिरात स्थापन केल्यास मंगल कार्यात वाढ होते. तसेच समुद्रमंथनातून प्रकट झालेल्या देवी लक्ष्मीची नवी मूर्ती किंवा प्रतिमा नववर्षाच्या शुभ मुहूर्तावर घरात स्थापित केल्यास धनवृद्धी, स्थैर्य आणि कौटुंबिक सुख लाभते, असे वास्तुशास्त्र सांगते.
नवीन वर्षाच्या सुरुवातीला या दिव्य वस्तूंपैकी कोणतीही एक श्रद्धेने आणि विधीपूर्वक घरात आणल्यास २०२६ हे वर्ष आर्थिक स्थैर्य, मानसिक शांती आणि सकारात्मकतेने परिपूर्ण राहील, असा विश्वास व्यक्त केला जात आहे.
------