अल्लू अर्जुन आणि दिग्दर्शक ॲटली कुमार यांच्या आगामी ‘राका’ चित्रपटाची रिलीजपूर्वीच गिनीज वर्ल्ड रेकॉर्डमध्ये नोंद झाली आहे. रिअल-टाइम मोशन कॅप्चर तंत्रज्ञानाच्या वापरातून ३७ कलाकारांचे एकाच वेळी चित्रण करण्याचा विक्रम सिनेमाने केला आहे.
मुंबई : अल्लू अर्जुनच्या आगामी ‘राका’ या बहुप्रतीक्षित चित्रपटाची चर्चा सध्या जोरात सुरू आहे. ‘पुष्पा’ आणि ‘पुष्पा २’मधून प्रेक्षकांच्या मनावर अधिराज्य गाजवल्यानंतर अल्लू अर्जुन आता दिग्दर्शक ॲटली कुमार यांच्यासोबत एका महत्त्वाकांक्षी प्रोजेक्टमध्ये दिसणार आहे. विशेष म्हणजे चित्रपटाच्या प्रदर्शनाला अजून बराच कालावधी बाकी असतानाच ‘राका’ने एक मोठा विक्रम आपल्या नावावर केला आहे. या चित्रपटाची गिनीज वर्ल्ड रेकॉर्डमध्ये नोंद झाली आहे.
सन पिक्चर्सच्या बॅनरखाली तयार होत असलेल्या ‘राका’ चित्रपटाचे दिग्दर्शन ‘जवान’ फेम ॲटली कुमार करत आहेत. या चित्रपटाशी संबंधित एक खास छायाचित्र निर्मात्यांकडून सोशल मीडियावर शेअर करण्यात आले आहे. या छायाचित्रात अल्लू अर्जुन आणि ॲटली कुमार यांच्या हातात गिनीज वर्ल्ड रेकॉर्डचे प्रमाणपत्र दिसत आहे. निर्मात्यांनी दिलेल्या माहितीनुसार, ‘राका’ने रिअल-टाइम मोशन कॅप्चर तंत्रज्ञानाच्या माध्यमातून एकाच वेळी सर्वाधिक लोकांचे चित्रण करण्याचा विक्रम केला आहे. या प्रक्रियेत तब्बल ३७ कलाकारांचे एकाच वेळी मोशन कॅप्चर करण्यात आले. याच कामगिरीची गिनीज वर्ल्ड रेकॉर्डमध्ये नोंद झाली आहे.
सन पिक्चर्सने सोशल मीडिया पोस्टद्वारे या विक्रमाची माहिती चाहत्यांसोबत शेअर केली. भारतीय चित्रपटसृष्टीसाठी ही जागतिक स्तरावरील उल्लेखनीय कामगिरी असल्याचे निर्मात्यांनी म्हटले आहे. अल्लू अर्जुन आणि ॲटली कुमार यांना या विक्रमासाठी गिनीज वर्ल्ड रेकॉर्डचे प्रमाणपत्र देण्यात आले आहे. मोशन कॅप्चर तंत्रज्ञानाच्या माध्यमातून कलाकारांच्या शरीराच्या हालचाली डिजिटल स्वरूपात नोंदवल्या जातात. या हालचालींचा वापर पुढे संगणकीय प्रतिमा आणि व्हिज्युअल इफेक्ट्स तयार करण्यासाठी केला जातो. ‘राका’मध्ये एकाच वेळी ३७ कलाकारांचे रिअल-टाइम मोशन कॅप्चर करण्यात आल्याने या तंत्रज्ञानाच्या वापराच्या दृष्टीने चित्रपटाने विशेष विक्रम केला आहे.
‘राका’मध्ये अल्लू अर्जुन मुख्य भूमिकेत दिसणार आहे. अभिनेत्री दीपिका पदुकोणचीही या चित्रपटात महत्त्वाची भूमिका असल्याची माहिती आहे. ॲटली कुमार यांच्या दिग्दर्शनाखाली तयार होणाऱ्या या चित्रपटाकडून चाहत्यांच्या मोठ्या अपेक्षा आहेत. निर्मात्यांनी ८ एप्रिल रोजी चित्रपटाची घोषणा करताना अल्लू अर्जुनचा फर्स्ट लुकही प्रदर्शित केला होता. या पोस्टरमध्ये अल्लू अर्जुनचा अत्यंत वेगळा आणि रहस्यमय लूक पाहायला मिळाला. त्याच्या चेहऱ्यावर मोठ्या आणि तीक्ष्ण नखांसारखी रचना असलेला लांडग्यासारखा हात दिसत होता. या फर्स्ट लुकमुळे चित्रपटाच्या कथानकाबाबत चाहत्यांमध्ये उत्सुकता निर्माण झाली आहे.
अल्लू अर्जुन आणि ॲटली कुमार यांची जोडी पहिल्यांदाच मोठ्या पडद्यावर एकत्र येत आहे. त्यात दीपिका पदुकोणची महत्त्वाची भूमिका आणि अत्याधुनिक तंत्रज्ञानाचा वापर यामुळे ‘राका’कडे प्रेक्षकांचे लक्ष लागले आहे. आता रिलीजपूर्वीच गिनीज वर्ल्ड रेकॉर्डमध्ये नोंद झाल्याने या चित्रपटाची चर्चा आणखी वाढली आहे.
______