JEE Main 2026 निकाल जाहीर; 26 विद्यार्थ्यांना 100 परसेंटाइल, 110 विद्यार्थ्यांचे निकाल रोखले, JEE Advanced नोंदणी 23 एप्रिलपासून
नवी दिल्ली : देशातील सर्वात प्रतिष्ठित अभियांत्रिकी प्रवेश परीक्षा असलेल्या JEE Main 2026 चा निकाल नेशनल टेस्टिंग एजन्सीकडून जाहीर करण्यात आला असून यंदाच्या निकालात अनेक बाबी विशेष ठरल्या आहेत. एकीकडे देशभरातील 26 विद्यार्थ्यांनी परफेक्ट 100 परसेंटाइल मिळवत आपली गुणवत्ता सिद्ध केली आहे, तर दुसरीकडे अनुचित साधनांचा वापर केल्याप्रकरणी 110 पेक्षा अधिक विद्यार्थ्यांचे निकाल रोखण्यात आले आहेत.
National Testing Agency ने जाहीर केलेल्या माहितीनुसार, यंदा 26 उमेदवारांनी 100 NTA स्कोर मिळवला आहे. विविध राज्यांमधील विद्यार्थ्यांनी यामध्ये अव्वल कामगिरी केली असून राजस्थान राज्यातून सर्वाधिक टॉपर समोर आले आहेत. देशातील विविध भागांतील गुणवंत विद्यार्थ्यांनी यंदा या परीक्षेत आपला ठसा उमटवला आहे.
परीक्षेची पारदर्शकता आणि शुचिता राखण्यासाठी NTA यंदा विशेष कडक भूमिकेत दिसून आली. एजन्सीने स्पष्ट केले की, 110 पेक्षा अधिक उमेदवारांचे निकाल ‘अनुचित साधनांचा वापर’ या कारणामुळे रोखण्यात आले आहेत. यामध्ये बनावट कागदपत्रे सादर करणे तसेच परीक्षेदरम्यान संशयास्पद हालचाली आढळणे अशा प्रकारांचा समावेश आहे. नकलविरोधी धोरणात कोणतीही तडजोड केली जाणार नसल्याचेही स्पष्ट करण्यात आले आहे.
दरम्यान, अंतिम उत्तरसूचीमध्ये भौतिकशास्त्र विषयातील दोन प्रश्न वगळण्यात आले असून सुधारित उत्तरसूचीच्या आधारे निकाल तयार करण्यात आला आहे. तज्ज्ञांच्या अंदाजानुसार, यंदा सर्वसाधारण गटासाठी कट-ऑफ सुमारे 93 ते 94 परसेंटाइलच्या दरम्यान राहण्याची शक्यता आहे.
JEE Main मध्ये पात्र ठरलेल्या आणि देशातील अव्वल 2.5 लाख विद्यार्थ्यांच्या यादीत स्थान मिळवणाऱ्या उमेदवारांना आता JEE Advanced 2026 साठी अर्ज करता येणार आहे. या परीक्षेसाठी नोंदणी प्रक्रिया 23 एप्रिल 2026 पासून सुरू होणार असून यंदा ही जबाबदारी Indian Institute of Technology Roorkee यांच्याकडे देण्यात आली आहे. या प्रक्रियेनंतर विद्यार्थ्यांसाठी देशातील अग्रगण्य आयआयटी संस्थांमध्ये प्रवेशाचा मार्ग खुला होणार आहे.
°°°°°