दिल्ली, मुंबई, कोलकाता व चेन्नईसह देशभरात लागू नवे दर
नवी दिल्ली : देशभरातील एलपीजी वापरकर्त्यांना डिसेंबर महिन्याच्या पहिल्याच दिवशी मोठा दिलासा मिळाला आहे. ऑइल मार्केटिंग कंपन्यांनी 1 डिसेंबर 2025 पासून 19 किलो वजनाच्या कमर्शियल एलपीजी सिलेंडरच्या किंमतीत कपात केली असून दिल्ली व कोलकात्यामध्ये 10 रुपये, तर मुंबई व चेन्नईमध्ये 11 रुपये घट करण्यात आली आहे. या कपातीमुळे रेस्टॉरंट, हॉटेल व्यवसाय, कॅटरिंग तसेच व्यावसायिक गॅसचा वापर करणाऱ्या उद्योगांना थेट आर्थिक मदत मिळणार आहे. दुसरीकडे, 14 किलोच्या घरगुती गॅस सिलेंडरच्या किंमती मात्र यापूर्वीप्रमाणेच कायम ठेवल्या गेल्या आहेत.
IOCL च्या वेबसाइटवरील अद्ययावत दरांनुसार 1 डिसेंबरपासून दिल्लीमध्ये 19 किलोचा कमर्शियल एलपीजी सिलेंडर 1590 रुपयांवरून 1580 रुपयांवर आला आहे. कोलकात्यातील नव्या किंमती 1694 रुपयांवरून 1684 रुपये इतक्या आहेत. मुंबईमध्ये हा सिलेंडर आता 1542 रुपयांऐवजी 1531 रुपयांना मिळणार असून चेन्नईमध्ये आधीचा 1750 रुपयांचा दर कमी होऊन 1739 रुपये इतकी किंमत लागू झाली आहे.
महानगरांखेरीज इतर शहरांमध्येही नवीन दर लागू झाले आहेत. बिहारच्या पटना येथे 14 किलोचा घरगुती सिलेंडर 951 रुपये तर 19 किलोचा व्यावसायिक सिलेंडर 1843.50 रुपये इतका आहे. लखनऊमध्ये 19 किलोचा सिलेंडर 1703 रुपये आणि घरगुती सिलेंडर 890.50 रुपये, तर भोपालमध्ये कमर्शियल सिलेंडर 1607.50 रुपये आणि घरगुती सिलेंडर 858.50 रुपये इतका उपलब्ध आहे.
मागील काही महिन्यांत कमर्शियल गॅसच्या किंमतीत वाढ-कपात अशा बदलांचा क्रम सुरू असताना घरगुती सिलेंडरचे भाव मात्र एप्रिलपासून यथावत ठेवण्यात आले आहेत. 1 डिसेंबर 2025 रोजीही 14 किलोच्या घरगुती सिलेंडरच्या किंमती दिल्लीमध्ये 853 रुपये, कोलकात्यात 879 रुपये, मुंबईमध्ये 852 रुपये आणि चेन्नईमध्ये 868 रुपये इतक्याच कायम राहिल्या आहेत.
किंमतीतील या कपातीमुळे व्यावसायिक गॅस वापरणाऱ्यांना मोठा दिलासा मिळत असला तरी सणासुदीच्या हंगामात घरगुती सिलेंडरचे दर बदलतील का, याकडे ग्राहकांचे लक्ष लागले आहे. फिलहाल, वर्षअखेरच्या या दरकपातीनं खर्चात अडकलेल्या व्यावसायिक क्षेत्राला तात्पुरता दिलासा मिळाल्याचे चित्र दिसत आहे.
-----------------------------------------------