नवी दिल्ली : देशातील शाळांमध्ये विद्यार्थ्यांच्या सुरक्षिततेबाबत चिंता वाढवणारी घटना समोर आली असून एका शिक्षिकेने विद्यार्थिनीच्या ओठांवर थेट सेलोटेप लावून शिक्षा केल्याचा प्रकार उघड झाला आहे. विद्यार्थ्यांची जबाबदारी सांभाळणाऱ्या शिक्षकांकडून अशा अमानुष आणि मानसिक वेदना देणाऱ्या शिक्षांचा अवलंब केला जात असल्याने पालकांमध्ये संतापाची भावना आहे. ही घटना शाळेतील मुलांच्या तक्रारीनंतर समोर आली असून शिक्षण क्षेत्रातील संवेदनशीलतेला धक्का देणारी आहे. शिक्षण देणारे, मार्गदर्शन करणारे शिक्षक जर शिक्षा देण्याच्या नावाखाली अशा आघोरी पद्धती वापरू लागले, तर शाळांमधील सुरक्षिततेबाबतचे प्रश्न पुन्हा गंभीर बनत असल्याचे चित्र यातून समोर येते.
तक्रारीची चौकशी करण्यात आल्यानंतर धक्कादायक तथ्य उघड झाले. विद्यार्थिनीला सेलोटेप लावण्यासोबतच संबंधित शिक्षिका मुलांना मारहाण करणे, वर्गातील वातावरण बिघडवणे आणि वरिष्ठांविरुद्ध खोट्या तक्रारी करून विभागाला दिशाभूल करणे असे प्रकारही घडवत असल्याचे तपासात निष्पन्न झाले. तपास समितीने अहवाल सादर करताच प्रशासनाने तात्काळ कारवाई करत शिक्षिकेला निलंबित केले आहे. या कारवाईनंतरही पालकांचा प्रश्न तसाच आहे की, अशा पद्धतीने विद्यार्थ्यांना मानहानीकारक शिक्षा देणाऱ्यांवर आणखी कठोर कारवाई का होऊ नये?
शाळांमध्ये विद्यार्थ्यांवर होत असलेल्या शारीरिक व मानसिक अत्याचारांच्या घटना वेळोवेळी समोर येत असल्या तरी अशा घटना रोखण्यासाठी प्रभावी उपाययोजना अद्यापही अपुऱ्या ठरत असल्याचे स्पष्ट होत आहे. शिक्षण क्षेत्रात संवेदनशीलता, मानसिक आरोग्य आणि विद्यार्थ्यांप्रती आदराची जाणीव वाढवण्यासाठी कठोर धोरणांची गरज असल्याचे या घटनेतून अधोरेखित झाले आहे.
ही घटना उत्तर प्रदेशातील लखीमपूर खीरी येथे घडली असून जिल्हा बेसिक शिक्षाधिकारी प्रवीण तिवारी यांच्या आदेशानुसार शिक्षिका सुनीता सैनी यांना निलंबित करण्यात आले आहे. पलिया खंड शिक्षाधिकारी रमन सिंह आणि जिल्हा समन्वयक रेनू श्रीवास्तव यांच्या दोन सदस्यीय समितीने तपास करून अहवाल सादर केला होता.
-------------------------------------------------