भारतातील आयटी क्षेत्रात वादळाची चाहूल!
नवी दिल्ली : भारतातील आयटी क्षेत्रात पुन्हा मोठं संकट उभं राहत असल्याची शक्यता व्यक्त केली जात आहे. 2025 च्या अखेरपर्यंत देशातील प्रमुख IT कंपन्यांकडून ५० हजारांहून अधिक कर्मचाऱ्यांची कपात केली जाण्याची शक्यता असून, हे संकट 2023 च्या तुलनेत दुप्पट प्रमाणात मोठं ठरणार आहे. गेल्या वर्षी सुमारे २५ हजार कर्मचाऱ्यांना कामावरून कमी केलं होतं.
‘इकॉनॉमिक टाईम्स’च्या वृत्तानुसार, टाटा कन्सल्टन्सी सर्व्हिसेस (TCS) सह इन्फोसिस, टेक महिंद्रा, विप्रो आणि एक्सेंचर यांसारख्या कंपन्यांनी कर्मचाऱ्यांची संख्या कमी करण्याची प्रक्रिया सुरू केली आहे. काही कंपन्यांनी थेट कपातीची घोषणा केली असून, काहींनी कर्मचाऱ्यांना स्वतःहून राजीनामा देण्यास किंवा नवीन नोकरी शोधण्यास सांगितले आहे.
टाटा कन्सल्टन्सी सर्व्हिसेसने (TCS) सप्टेंबर तिमाहीचे निकाल जाहीर करताना सांगितले की, पुनर्गठन प्रक्रियेत सुमारे एक टक्का म्हणजेच 6,000 कर्मचाऱ्यांना कामावरून कमी करण्यात आले आहे.
टीसीएसचे मुख्य मानव संसाधन अधिकारी सुदीप कुन्नुमल यांनी सांगितले की, माध्यमांमधून फिरणारी आकडेवारी अतिशयोक्तीपूर्ण आहे. “कपात फक्त मध्यम आणि वरिष्ठ स्तरावर करण्यात आली असून, या कर्मचाऱ्यांना पुन्हा योग्य पदावर नियुक्त करता आले नाही,” असे ते म्हणाले.
तथापि, यापूर्वी टीसीएसने जुलै महिन्यातच संकेत दिला होता की, कंपनी या वर्षी जागतिक स्तरावर २ टक्के म्हणजेच सुमारे १२,००० कर्मचाऱ्यांची कपात करण्याच्या तयारीत आहे.
एचएफएस रिसर्चचे सीईओ फिल फर्शथ यांच्या मते, “या वर्षी अनेक कंपन्यांनी हजारो पदे कोणालाही न सांगता संपुष्टात आणली आहेत. भरती थांबली आहे, बढत्या पुढे ढकलल्या जात आहेत आणि कामगिरीच्या नावाखाली लोकांना बाहेर काढलं जातंय.”
टीमलीज डिजिटलच्या सीईओ नीती शर्मा यांच्या मते, “2025 मध्ये ही संख्या 55,000 ते 60,000 पर्यंत पोहोचू शकते.” दरम्यान, एक्सेंचरने जून ते ऑगस्ट दरम्यान जागतिक स्तरावर 11,000 कर्मचाऱ्यांना कमी केल्याचंही समोर आलं आहे.
तज्ज्ञांच्या मते, आयटी कंपन्या आता पारंपरिक कर्मचाऱ्यांपेक्षा कृत्रिम बुद्धिमत्ता (AI) आधारित डिजिटल लेबर वर अधिक अवलंबून राहू लागल्या आहेत, ज्यामुळे मानव संसाधनाची गरज झपाट्याने कमी होत आहे.
तज्ज्ञांचे म्हणणे आहे की, पुढील अडीच महिने आयटी क्षेत्रासाठी अतिशय निर्णायक ठरणार आहेत. AI ऑटोमेशन आणि जागतिक मागणीतील घट यामुळे नोकऱ्यांवरील दबाव वाढणार असून, 2025 च्या मध्यापर्यंत भारतातील IT क्षेत्रात मोठा फेरबदल दिसू शकतो.
A storm is brewing in India's IT sector!