मागण्या सोडवा, थकीत ४ हजार कोटींची रक्कम द्या !
मुंबई : महाराष्ट्र राज्य मार्ग परिवहन महामंडळातील कर्मचाऱ्यांनी पुन्हा लढ्याचं बिगुल वाजवलं आहे. वेतनवाढ, महागाई भत्ता आणि थकीत देणी यांसह विविध आर्थिक मागण्यांसाठी महाराष्ट्र एसटी कामगार संघटना कृती समितीने आझाद मैदानावर धरणे आंदोलन सुरू केलं आहे. आंदोलनावर कायम राहण्याचा निर्णय समितीने घेतला असून, सरकारकडून थकीत ४,००० कोटी रुपयांची रक्कम मिळेपर्यंत आंदोलन मागे घेतले जाणार नाही, असा ठाम इशारा देण्यात आला आहे.
दिवाळीचा सण आणि शाळांच्या सुट्ट्यांचा काळ जवळ आल्याने, एसटी कर्मचाऱ्यांच्या या आंदोलनामुळे राज्यभरातील प्रवाशांना मोठ्या गैरसोयीचा सामना करावा लागू शकतो. ही स्थिती लक्षात घेऊन, उपमुख्यमंत्री एकनाथ शिंदे आणि परिवहन मंत्री प्रताप सरनाईक यांनी सोमवारी दुपारी कृती समितीच्या पदाधिकाऱ्यांसोबत चर्चा आयोजित केली आहे.
रविवारी मुंबईत झालेल्या कृती समितीच्या बैठकीत हणमंत ताटे, श्रीरंग बरगे, संदीप शिंदे, हिरेन रेडकर, पांडुरंग वाघमारे, दादाराव डोंगरे, बंडू फड, संतोष गायकवाड, राजेंद्र मोजाड, विनोद गजभिये, अरुण वीरकर, गौतम कांबळे, विश्वनाथ जाधव यांसारखे प्रमुख पदाधिकारी उपस्थित होते. या बैठकीत आंदोलनावर ठाम राहण्याचा आणि तोडगा निघेपर्यंत मागे न हटण्याचा निर्णय घेण्यात आला
कृती समितीअंतर्गत १८ संघटनांनी एकत्र येत सरकारविरोधात भूमिका घेतली असून, २०१८ पासूनचा महागाई भत्त्याचा फरक, तसेच २०२० ते २०२४ दरम्यानच्या वेतनवाढीचा फरक अजूनही कर्मचाऱ्यांना मिळालेला नाही. याशिवाय इतर अनेक देणग्या थकीत असून, एकूण रक्कम ४,००० कोटी रुपयांपेक्षा अधिक असल्याचा दावा कर्मचाऱ्यांनी केला आहे.
“शासनाने एकदाच ही थकीत रक्कम एसटी महामंडळाला द्यावी, जेणेकरून कर्मचाऱ्यांना त्यांच्या हक्काचे पैसे मिळतील. अन्यथा बेमुदत ठिय्या आंदोलन सुरूच राहील,” असा इशारा कृती समितीने दिला आहे.
दरम्यान, महाराष्ट्र एसटी कर्मचारी काँग्रेसने याच मागण्यांसाठी मशाल मोर्चा आणि ठिय्या आंदोलनाची वेगळी नोटीस दिली होती. परंतु मागण्या सारख्याच असल्याने, त्यांनी आपले आंदोलन मागे घेत कृती समितीच्या आंदोलनात सहभागी होण्याचा निर्णय घेतल्याचे सरचिटणीस श्रीरंग बरगे यांनी सांगितले.
एकूणच, राज्यातील एसटी कर्मचाऱ्यांचे आंदोलन दिवाळीच्या उंबरठ्यावर सरकारसाठी नव्या डोकेदुखीचं कारण ठरलं आहे. जर सोमवारच्या बैठकीत ठोस निर्णय झाला नाही, तर दिवाळीच्या गर्दीत प्रवाशांना मोठ्या गैरसोयीचा सामना करावा लागणार हे निश्चित आहे.
ST employees protest Resolve demands