सरकारने जाहीर केली 'राष्ट्रीय महामारी'
टोकियो / नवी दिल्ली : जपानमध्ये फ्लूच्या वाढत्या संसर्गामुळे आरोग्य यंत्रणेवर मोठा ताण निर्माण झाला आहे. देशभरात ४,००० हून अधिक लोकांना फ्लूच्या तीव्र लक्षणांमुळे रुग्णालयात दाखल करावे लागले असून, सरकारने अधिकृतपणे ‘राष्ट्रीय महामारी’ (National Epidemic) जाहीर केली आहे.
स्थानिक माध्यमांच्या अहवालानुसार, देशभरातील सुमारे ३,००० रुग्णालयांमध्ये एकूण ४,०३० फ्लू रुग्णांवर उपचार सुरू आहेत. सर्वाधिक प्रादुर्भाव ओकिनावा, टोकियो आणि कागोशिमा या शहरांमध्ये आढळून आला आहे. परिस्थिती गंभीर होत असल्याने १३० हून अधिक शाळा, बालवाड्या आणि चाइल्डकेअर सेंटर्स तात्पुरत्या बंद करण्यात आल्या आहेत.
आरोग्य तज्ज्ञांच्या मते, फ्लू हा प्रत्येक वर्षी आढळणारा आजार असला तरी यावर्षी त्याचा प्रादुर्भाव मौसमी काळाच्या पाच आठवडे आधीच सुरू झाला, ज्यामुळे वैद्यकीय सेवा प्रणालीवर अतिरिक्त दबाव आला आहे.
२२ ते २८ सप्टेंबरदरम्यान ४,००० हून अधिक रुग्णांवर फ्लूचे उपचार करण्यात आले, तर २९ सप्टेंबर ते ५ ऑक्टोबरदरम्यान ही संख्या ६,०००च्या पुढे गेली आहे. जपानच्या ४७ पैकी २८ प्रांतांमध्ये फ्लूचे प्रमाण झपाट्याने वाढले आहे.
होक्काइडो हेल्थ सायन्सेस विद्यापीठाचे प्राध्यापक योको त्सुकामोटो यांच्या मते, या वर्षी फ्लूचा हंगाम नेहमीपेक्षा लवकर सुरू झाला आहे. विषाणूच्या वर्तनात आणि स्वरूपात झालेले बदल हे या तीव्र प्रादुर्भावाचे मुख्य कारण आहेत.”
अनेक रुग्णालयांमध्ये पुन्हा कोविड-१९ काळासारखी गर्दी पाहायला मिळत आहे. रुग्णसंख्या झपाट्याने वाढत असल्याने सरकारने नागरिकांना सतर्क राहण्याचे आणि जपानला प्रवास टाळण्याचे आवाहन केले आहे.
टोकियोस्थित ट्रॅव्हल विश्लेषक अ‍ॅशली हार्वे यांच्या मते सध्याच्या परिस्थितीत संक्रमण टाळण्यासाठी मास्क वापरणे, हात वारंवार धुणे आणि स्वच्छता पाळणे अत्यंत महत्त्वाचे आहे.”
आरोग्य तज्ज्ञांच्या मते, कोरोना नंतर वाढलेले आंतरराष्ट्रीय पर्यटन आणि लोकांची सीमापार हालचाल ही फ्लू प्रसाराची प्रमुख कारणे आहेत. विशेषतः लहान मुले, वृद्ध आणि गंभीर आजारांनी ग्रस्त व्यक्तींनी फ्लूविरोधी लस (Influenza Vaccine) घेण्याचा सल्ला देण्यात आला आहे.
तज्ज्ञांचे म्हणणे आहे की, सामान्यतः फ्लू आरोग्यदृष्ट्या निरोगी व्यक्तीसाठी घातक नसतो, परंतु नवीन व्हेरिएंट्समुळे परिस्थिती गंभीर होऊ शकते. त्यामुळे स्वच्छता, मास्कचा वापर आणि लसीकरण हेच सध्या सर्वात प्रभावी उपाय मानले जात आहेत.
Flu wreaks havoc in Japan declares national epidemic