ऐन सणाच्या दिवसात आय आर सी टी सी ची साईट,ॲप बंद

 

लाखो प्रवाशांना मोठ्या अडचणीं, मनस्ताप

नवी दिल्ली : सणाच्या हंगामात इंडियन रेल्वे कॅटरिंग अँड टुरिझम कॉर्पोरेशन (IRCTC) ची वेबसाइट आणि मोबाइल ॲप अचानक ठप्प झाल्याने लाखो प्रवाशांना मोठ्या अडचणींचा सामना करावा लागला. धनतेरसच्या दिवशीच्या प्रवासासाठी शुक्रवार सकाळी तत्काळ तिकीट बुकिंग सुरू होणार होती. नेहमीप्रमाणे सकाळी 10 वाजता एसी वर्गाची बुकिंग आणि 11 वाजता नॉन-एसी वर्गाची बुकिंग सुरू होणार होती. मात्र, वेबसाइट आणि ॲप दोन्ही एकाच वेळी बंद पडल्याने प्रवासी तिकीट बुक करण्यात अपयशी ठरले.

सूत्रांच्या माहितीनुसार ही अडचण सर्व्हरशी संबंधित होती. IRCTC अधिकाऱ्यांच्या मते, तांत्रिक बिघाडामुळे वेबसाइट काही वेळ बंद झाली होती, मात्र ती सुमारे 11:15 वाजता पुन्हा सुरू करण्यात आली. तांत्रिक टीमने सर्व्हरमधील त्रुटी दूर केली.

या अचानक आलेल्या बिघाडामुळे जे प्रवासी धनतेरस आणि दिवाळीच्या काळात घरी जाण्यासाठी तिकीट बुक करण्याच्या तयारीत होते, त्यांना मोठा फटका बसला. तिकीट बुकिंग सुरू होताच अनेकांनी वेबसाइटवर लॉगिन करण्याचा प्रयत्न केला, पण "Server Down" आणि "Technical Error" अशा संदेशांमुळे अनेकांचे बुकिंग अडकले.

भारतीय रेल्वेचे ऑनलाइन तिकीट बुकिंगसाठी IRCTC हे एकमेव अधिकृत व्यासपीठ आहे. दररोज सुमारे 12.5 लाख तिकीटे याच वेबसाइट आणि मोबाइल ॲपद्वारे बुक केली जातात. रेल्वेच्या एकूण तिकीट बुकिंगपैकी जवळपास 84 टक्के बुकिंग ऑनलाइन केली जाते.

या घटनेचा परिणाम शेअर बाजारातही दिसून आला. शुक्रवार सकाळी 11 वाजेपर्यंत बीएसईवर IRCTC चा शेअर 0.28 टक्क्यांनी घसरून 717.05 रुपयांवर व्यापार करत होता. मागील एका आठवड्यात शेअरमध्ये 0.34 टक्क्यांची वाढ झाली होती, तर दोन आठवड्यांत 1.44 टक्क्यांची वाढ नोंदवली गेली. गेल्या सहा महिन्यांत मात्र IRCTC च्या शेअरमध्ये 6.74 टक्क्यांची आणि एका वर्षात तब्बल 17.69 टक्क्यांची घसरण झाली आहे. कंपनीचे सध्याचे बाजार मूल्य अंदाजे 57,400 कोटी रुपये आहे.

इंडियन रेल्वे कॅटरिंग अँड टुरिझम कॉर्पोरेशन (IRCTC) ची स्थापना 27 सप्टेंबर 1999 रोजी रेल्वे मंत्रालयाच्या अधिपत्याखाली एक मिनीरत्न पीएसयू म्हणून करण्यात आली होती. या संस्थेचे मुख्य उद्दिष्ट म्हणजे रेल्वे स्थानकांवर आणि गाड्यांमध्ये कॅटरिंग व हॉस्पिटॅलिटी सेवा पुरवणे, बजेट हॉटेल्स आणि टूर पॅकेजेसद्वारे देशांतर्गत आणि आंतरराष्ट्रीय पर्यटनाला चालना देणे, तसेच ग्लोबल रिझर्वेशन सिस्टीमचा विकास करणे हे आहे.