अजित पवार गटाच्या आमदारावर आरोप, सात अटकेत
नांदेड महापालिकेचे माजी विरोधी पक्षनेते जीवन घोगरे यांच्या अपहरण व मारहाण प्रकरणात लोहा-कंधारचे आमदार प्रताप पाटील चिखलीकर यांच्यावर गंभीर आरोप झाले असून पोलिसांनी सात जणांना अटक केली आहे.
नांदेड : महापालिका निवडणुका तोंडावर असताना नांदेड जिल्ह्यात खळबळ उडवणारी घटना समोर आली आहे. नांदेड महापालिकेचे माजी विरोधी पक्षनेते आणि राष्ट्रवादी काँग्रेसचे नेते जीवन घोगरे पाटील यांचे दिवसाढवळ्या अपहरण करून त्यांना अमानुष मारहाण करण्यात आल्याचा गंभीर आरोप त्यांनी केला आहे. ही संपूर्ण घटना परिसरातील सीसीटीव्ही कॅमेऱ्यात कैद झाली असून त्यामुळे राजकीय वातावरण तापले आहे.
सोमवारी दुपारी सुमारे बारा वाजण्याच्या सुमारास जीवन घोगरे हे घरातून कामानिमित्त बाहेर पडले होते. हडको परिसरातील पाण्याच्या टाकीजवळ त्यांच्या वाहनाला अडवून काही जणांनी जबरदस्तीने त्यांना दुसऱ्या वाहनात बसवले. त्यानंतर त्यांना अज्ञात ठिकाणी नेऊन जबर मारहाण करण्यात आली. काही वेळानंतर मुसलमानवाडी परिसरात त्यांना जखमी अवस्थेत सोडून देण्यात आले.
या हल्ल्यात डोक्याला गंभीर दुखापत झाल्यामुळे जीवन घोगरे यांची प्रकृती बिघडली असून त्यांच्यावर उपचार सुरू आहेत. आपल्याला सात जणांनी मारहाण केल्याचा आरोप त्यांनी केला आहे. अपहरणकर्त्यांनी “तुझा संतोष देशमुख करू” अशी धमकी दिल्याचेही घोगरे यांनी सांगितले आहे. या घटनेनंतर पोलिसांनी तत्काळ घटनास्थळी धाव घेत तपासाची चक्रे वेगाने फिरवली.
या प्रकरणात जीवन घोगरे यांनी लोहा-कंधारचे आमदार प्रताप पाटील चिखलीकर, माजी आमदार मोहन हंबर्डे आणि प्रवीण पाटील चिखलीकर यांच्यावर थेट आरोप केले आहेत. आमदार प्रताप पाटील चिखलीकर यांच्या सांगण्यावरूनच आपल्यावर हा हल्ला करण्यात आल्याचा दावा घोगरे यांनी केला आहे. वृत्तवाहिनीशी बोलताना त्यांनी म्हटले की, “चिखलीकर भावी मंत्री आहेत, त्यांच्या नादी लागू नकोस,” अशी धमकी अपहरणकर्त्यांनी दिली.
या प्रकरणी पोलिसांनी सात जणांना अटक केली असून जीवन घोगरे यांच्या फिर्यादीवरून गुन्हा दाखल करण्यात आला आहे. अटक करण्यात आलेल्या आरोपींपैकी तीन आरोपी हे रेकॉर्डवरील गुन्हेगार असल्याची माहिती समोर आली आहे. अटक करण्यात आलेल्या आरोपींमध्ये शुभम दत्ता सुनेवाड, राहुल मारोती दासरवाड, कौस्तुभ रमेश रणवीर, विवेक नरहरी सूर्यवंशी, माधव बालाजी वाघमारे आणि वाहन चालक मोहंमद अफ्रोज फकीर यांचा समावेश आहे.
या हल्ल्याच्या निषेधार्थ मंगळवारी नांदेडमधील सिडको भाग पूर्णतः बंद ठेवण्याचा निर्णय घेण्यात आला आहे. “नांदेडमधील गुंडाराज बंद करा, अशा गुंडांना मोठं करू नका,” असे आवाहन जीवन घोगरे यांनी राज्याचे उपमुख्यमंत्री अजित पवार यांना केले आहे. दरम्यान, या संपूर्ण प्रकरणाचा अधिक तपास पोलीस करत असून पुढील कारवाईकडे संपूर्ण जिल्ह्याचे लक्ष लागले आहे.
_______