आयोध्या : श्रीराम जन्मभूमी मंदिरावर भगवा धर्मध्वज फडकवला जात असून, राम मंदिराच्या संपूर्ण बांधकामानंतर पहिल्यांदाच हा भव्य धार्मिक सोहळा होत आहे. प्रभुरामाच्या नगरीत या वैभवशाली ध्वजारोहणासाठी विशेष सजावट करण्यात आली असून, शहरातील प्रत्येक कोपरा रोषणाईने उजळून निघाला आहे. मंदिर शिखरावर प्रभु राम आणि माता सीता यांच्याशी संबंधित बीती रात्रीच्या लेजर शोने दर्शनार्थींसह संपूर्ण अयोध्येचे मन मोहून टाकले. आज होणाऱ्या महानुष्ठानामुळे मंदिर परिसराचे दिमाखदार रूप अवघ्या देशाचे लक्ष वेधून घेत आहे.
पंतप्रधान नरेंद्र मोदी अयोध्येला पोहोचून सप्तमंदिर आणि शेषावतार मंदिराला भेट देतील. त्यानंतर ते रामलला मंदिर परिसरात पूजा-अर्चना करून दुपारी बरोबर 1 श्रीराम मंदिराच्या शिखरावर केसरिया धर्मध्वज फडकवतील. या सोहळ्यासाठी श्रीराम मंदिर ट्रस्टने मोठ्या प्रमाणावर मान्यवरांना आमंत्रित केले असून, पंतप्रधानांच्या दौऱ्याच्या पार्श्वभूमीवर सुरक्षा यंत्रणांनी अभेद्य बंदोबस्त उभारला आहे. मंदिर परिसरात प्रवेश फक्त QR कोड असलेल्या आमंत्रित पाहुण्यांनाच मिळणार असून, सामान्यांना मंदिरात प्रवेश दिला जाणार नाही.
आजचे ध्वजारोहण अत्यंत शुभ अशा अभिजीत मुहूर्तात होणार असून हा मुहूर्त सकाळी 11.45 ते दुपारी 12.29 या 44 मिनिटांचा आहे. ज्योतिषांच्या मते, भगवान रामांचा जन्म याच अभिजीत मुहूर्तात झाला असल्यामुळे राममंदिरातील धर्मध्वजारोहणासाठी याच काळाची निवड करण्यात आली आहे. धार्मिक परंपरेनुसार मंदिरावरील धर्मध्वज हा दैवी शक्ती, वैभव, संरक्षण आणि विजयाचा प्रतीक मानला जातो. राममंदिरावरील हे ध्वजारोहण मंदिराच्या पूर्णत्वाचा आणि भारतीय संस्कृतीतील एका मोठ्या अध्यात्मिक पर्वाचा प्रारंभ दर्शवणारे ठरणार आहे.
पंतप्रधान मोदी यांचा कार्यक्रम अयोध्या विमानतळावरून हेलिकॉप्टरद्वारे साकेत विद्यापीठात आगमनानंतर सुरू होईल. तेथून मोठ्या रोड शोद्वारे ते मंदिराकडे रवाना होतील. दरम्यान, लाखो भाविकांचा उत्साह आणि देशभरातून येणाऱ्या श्रद्धेच्या लोटामुळे अयोध्या नगरीत जल्लोषाचे वातावरण निर्माण झाले आहे.
---------------