प्रवाशांत भीती, दोन संशयित अटकेत
लंडन : ब्रिटनमधील केंब्रिजशायर येथे शनिवारी सायंकाळी एका ट्रेनमध्ये चाकू हल्ल्याची थरारक घटना घडली. या हल्ल्यात सुमारे 10 प्रवासी जखमी झाले असून, त्यापैकी नऊ जणांना जीवघेण्या जखमा झाल्या आहेत. घटनेनंतर ट्रेनमध्ये भीती आणि गोंधळाचे वातावरण निर्माण झाले. पोलिसांनी तत्काळ कारवाई करत ट्रेन हंटिंगडन स्टेशनवर थांबवली आणि दोन संशयितांना अटक केली. या घटनेनंतर परिसरात सुरक्षा वाढवण्यात आली असून तपास सुरू आहे.
केंब्रिजशायर पोलिसांच्या माहितीनुसार, शनिवारी पोलिसांना माहिती मिळाली की ट्रेनमध्ये काही प्रवाशांवर चाकूने हल्ला करण्यात आला आहे. ट्रेन हंटिंगडनजवळ पोहोचताच पोलिसांनी ट्रेनला थांबवून परिसराची घेराबंदी केली. सशस्त्र पोलिसांनी ट्रेनमध्ये प्रवेश करून परिस्थिती नियंत्रणात आणली आणि घटनास्थळावरून दोन संशयितांना ताब्यात घेतले.
जखमी प्रवाशांना तत्काळ जवळच्या रुग्णालयात दाखल करण्यात आले असून त्यांच्यावर उपचार सुरू आहेत. पोलिसांनी सांगितले की, या हल्ल्यामागील हेतू अद्याप स्पष्ट झालेला नाही. केंब्रिजशायर पोलिस आणि ब्रिटिश ट्रान्सपोर्ट पोलिस (BTP) या प्रकरणाचा संयुक्त तपास करत आहेत.
ब्रिटनचे पंतप्रधान किअर स्टार्मर यांनी या घटनेची तीव्र निंदा केली. त्यांनी सोशल मीडियावर लिहिले, “हंटिंगडनजवळ ट्रेनमध्ये झालेला हा हल्ला अत्यंत चिंताजनक आहे. माझ्या संवेदना सर्व पीडितांसोबत आहेत. आपत्कालीन सेवांचे मी आभार मानतो.”
यूकेच्या गृहसचिव शबाना महमूद यांनीही या घटनेबद्दल दुःख व्यक्त केले असून त्या सतत परिस्थितीवर लक्ष ठेवून आहेत. त्यांनी सांगितले की, “ही अत्यंत दुर्दैवी घटना आहे. दोन संशयितांना अटक करण्यात आली असून, कोणत्याही प्रकारच्या अफवा किंवा चुकीच्या माहितीकडून नागरिकांनी दूर राहावे.”
या घटनेनंतर त्या मार्गावरील ट्रेनसेवा काही काळासाठी विस्कळीत झाली. पोलिसांनी घटनास्थळ सील करून फॉरेन्सिक टीम तपासासाठी पाचारण केली आहे. सध्या जखमींची अचूक संख्या किंवा प्रकृतीविषयी माहिती देण्यात आलेली नाही. तपास जसजसा पुढे जाईल, तसतशी अधिक माहिती प्रसिद्ध केली जाणार असल्याचे पोलिसांनी स्पष्ट केले आहे.
ट्रेनमध्ये झालेल्या सामूहिक चाकू हल्ल्यानंतर १० जणांना रुग्णालयात दाखल करण्यात आले आहे, त्यापैकी नऊ जणांना गंभीर दुखापत झाली आहे आणि दहशतवादविरोधी पोलिस त्या अनुषंगाने तपास करत आहेत.
रविवारी पहाटे एका निवेदनात, ट्रेनमधील सुरक्षा बाबींची जबाबदारी असल्याने प्रतिसादात पुढाकार घेणाऱ्या ब्रिटिश ट्रान्सपोर्ट पोलिसांनी सांगितले की, चाकू हल्ल्यांप्रकरणी दोन जणांना अटक करण्यात आली आहे.
"दहा जणांना रुग्णालयात नेण्यात आले आहे आणि नऊ जणांना जीवघेण्या जखमा झाल्याचे मानले जात आहे," असे निवेदनात म्हटले आहे. "ही एक मोठी घटना घोषित करण्यात आली आहे आणि या घटनेची संपूर्ण परिस्थिती आणि प्रेरणा स्थापित करण्यासाठी आम्ही काम करत असताना दहशतवादविरोधी पोलिस आमच्या तपासाला पाठिंबा देत आहेत.”