सूर्यकिरणांचा दणका! फ्लाइट कंट्रोल डेटामध्ये बिघाड
नवी दिल्ली : भारतातील प्रवाशांना मोठ्या उड्डाण अडचणींचा सामना करावा लागू शकतो, कारण एअरबस ए320 विमानांमध्ये गंभीर तांत्रिक त्रुटी समोर आली आहे. एअरबसने जाहीर केले की अत्यंत तेज सूर्यकिरणांमुळे ए320 कुटुंबातील काही विमानांच्या फ्लाइट कंट्रोल सिस्टिमसाठी आवश्यक असलेला महत्त्वाचा डेटा खराब होऊ शकतो. हा डेटा चुकीचा झाल्यास विमानाच्या नियंत्रण क्षमतेवर थेट परिणाम होण्याचा धोका निर्माण होतो.
भारतात इंडिगो, एअर इंडिया आणि एअर इंडिया एक्सप्रेसकडे ए320 फ्लिटची मोठी संख्या असून या त्रुटीचा फटका त्यातील अनेक विमानांना बसू शकतो. सध्या भारतात 560 पेक्षा जास्त ए320 विमाने उड्डाणे करत असून त्यापैकी सुमारे 200 ते 250 विमानांना ताबडतोब तपासणी व तांत्रिक बदलाची गरज आहे. काही विमानांमध्ये सॉफ्टवेअर अद्ययावत करणे तर काहींमध्ये हार्डवेअर बदलणे आवश्यक होणार आहे. हा बदल पूर्ण होत असताना संबंधित विमानांना ग्राउंड करावे लागणार असल्याने अनेक फ्लाइट्स उशिरा किंवा रद्द होण्याची शक्यता वाढली आहे.
युरोपियन युनियन एव्हिएशन सेफ्टी एजन्सी (EASA) ने तातडीचा सुरक्षा निर्देश जारी करून फ्लाइट कंट्रोल हाताळणाऱ्या ईएलएसी कॉम्प्युटरचे नवीन आणि योग्य मॉड्यूल बसवणे आवश्यक असल्याचे सांगितले आहे. एअरबसच्या प्रवक्त्यांच्या मते दुरुस्ती आणि तांत्रिक बदल प्रक्रियेमुळे जागतिक स्तरावर सुमारे 6,000 विमानांवर परिणाम होऊ शकतो, जे परिस्थितीची गंभीरता दर्शवते.
दरम्यान एअर इंडिया एक्सप्रेसने या अलर्टनंतर सावधगिरीचे उपाय राबवले असल्याचे जाहीर केले. त्यांनी सांगितले की त्यांच्या बहुतांश विमानांवर या समस्येचा परिणाम होणार नाही, परंतु जागतिक स्तरावरील सुरक्षादिशांनुसार काही फ्लाइट्सला उशिर होण्याची किंवा रद्द होण्याची शक्यता असू शकते. प्रवाशांना फ्लाइट स्टेटस वेबसाइट, अॅप किंवा चॅटबॉटद्वारे तपासत राहण्याचे आणि संपर्क माहिती अद्ययावत ठेवण्याचे आवाहन करण्यात आले आहे. या अनपेक्षित तांत्रिक बिघाडामुळे भारतातील आणि जागतिक विमान वाहतूक व्यवस्थेवर तात्पुरता ताण येण्याची शक्यता असून या संकटाचा परिणाम पुढील काही दिवस जाणवू शकतो.
-------------------------------------------------